Ég viðurkenni fúslega að ég hef eytt töluverðum tíma í grúsk til að reyna að átta mig á því hvernig innra starfi félagsins er háttað. Það eru þá helst lög félagsins sem ég hef reitt mig á en í þeim er þó að finna ósamræmi t.a.m. hvað varðar framboðsfrest (gr. 12, gr. 21 og gr. 30). Ég hef það frá varaformanni að þessu verði kippt í liðinn með lagabreytingum á komandi aðalfundi, 3. maí nk.

Fyrir utan lög félagsins er tiltölulega erfitt að átta sig á skipulaginu út frá heimasíðunni. Ég dirfðist þó til þess að gera tilraun með að setja þetta upp í einhvers konar myndrænt skipurit. Bið ég alla þá sem betur þekkja til að leiðrétta mig og þigg ég allar ábendingar heilshugar.

Eins og fram kemur í öðrum pistli sem ég skrifaði hér á síðunni undir heitinu ,,Lítið félag með stórt hlutverk“ er það varla ætlandi nokkurri manneskju að reka fag- og stéttarfélag í hjáverkum sem sjálfboðaliðar.

En kíkjum á ,,rannsóknarstarf“ mitt, myndrænt skipurit sem ég vona að gefi einhverja mynd af innra starfi Leiðsagnar og þeim veigamiklu hagsmunamálum sem eru á hendi fárra sjálfboðaliða.

Bið ég alla sem þetta lesa að virða viljann fyrir verkið og ég ítreka að allar ábendingar eru vel þegnar.

Samkvæmt mínum upplýsingum er samanlagt eitt stöðugildi (þ.e. starfsmaður á skrifstofu í 75% starfi og formaður í 25%) að sinna fag- og stéttarfélagi Leiðsögumanna. Önnur verkefni eru innt af hendi af sjálfboðaliðum sem ekkert endilega hafa sérfræðiþekkingu á þeim margvíslegu verkefnum sem heyra hér undir.

Ef við lokum öðru auganu og hugsum bara um stéttarfélagshlutverkið, má spyrja hvort þetta fyrirkomulag í innra skipulagi Leiðsagnar sé skilvirkt, ábyrgt og vel rökstutt?

Hvernig er mögulegt að sinna þeim margslungnu verkefnum, sem koma inn á borð stéttarfélags með sóma, í sjálfboðaliðastarfi?

 

Hefur Félag leiðsögumanna það bolmagn sem til þarf við úrlausn yfirgripsmikilla og oft á tíðum viðkvæmra málefna sem koma inn á borð stéttarfélaga og eru iðulega unnin af hópi sérfræðinga?

 

Hvernig skilgreinum við góða þjónustu við félagsmenn með hliðsjón af því að skrifstofa Leiðsagnar er opin í tvær klst. á dag virka daga og lokað á föstudögum?

 

Já, fjöldi áleitinna spuringa leita á hugann, en eins og fram kemur í öðrum pistlum hér á síðunni er er það skýrt í mínum huga að Leiðsögn – Félag leiðsögumanna þarf að fara í rækilega stefnumótunarvinnu, endurskoðun og skipulagsbreytingar.

Það er hins vegar ekki hlutverk formanns að ákveða hvort fara á í breytingar né hvernig þeim breytingum yrði háttað, heldur félagsmanna. ♦