Fyrir hvað stendur Leiðsögn? Er um fag- eða stéttarfélag að ræða?  Eða er hlutverk þess tvíþætt?

Í lögum félagsins 2. gr. er kveðið á um hlutverkið, stóru myndinni:

 ,,Félagið er samstarfsvettvangur og stéttarfélag leiðsögumanna í ferðaþjónustu á Íslandi og gætir hagsmuna þeirra og vinnur að því að efla menntun og menntunarmöguleika leiðsögumanna.“

Leiðsögn er því lítið félag með risastór og margþætt hlutverk.

Öllum þeim markmiðum, þeim miklu hagsmunamálum og verkefnum sem getið er um í lögum félagsins eru  – meira og minna – innt af hendi af sjálfboðaliðum. Er það raunhæft?

Þegar ég rýni í lögin, skipurit og skipulag Leiðsagnar spyr ég mig:

Hvernig í fjáranum fara þessir örfáu sjálfboðaliðar, kollegar okkar,  að því að sinna svo veigamiklum störfum í hjáverkum?

Ég tel að gera þurfi skipulagsbreytingar á félaginu okkar og þá ekki síst með það í huga að dreifa ábyrgð og valdi innan félagsins.

Við þurfum að spyrja okkur spurninga á borð við:

Af hverju veigra félagsmenn sér við þátttöku í trúnaðarstörfum innan Leiðsagnar? 

 

Af hverju eru svo fáir leiðsögumenn með stéttarfélagsaðild sem raun ber vitni? 

Mitt mat er að félagið stríði við alvarlega ímyndarvanda þessi dægrin. Reyndar tel ég það vera lífsspursmál fyrir Leiðsögn núna fara í öfluga stefnumótunarvinnu. Við mótun framtíðarsýnar Félags leiðsögumanna er gríðarlega mikilvægt að hlustað sé á raddir allra félagsmanna.

Aðeins þannig verður hlutverk og markmið Félags leiðsögumanna skýr og markviss inn í framtíðina. 

Félagið er samstarfsvettvangur og stéttarfélag leiðsögumanna í ferðaþjónustu á Íslandi og gætir hagsmuna þeirra og vinnur að því að efla menntun og menntunarmöguleika leiðsögumanna.